Оюутолгойн ажилтан амиа алдаж, бас нэг ажилтан СЭМҮТ-д хүргэгджээ

Ж. Нямсүрэн
Цахиур - Сэтгүүлч
2 долоо хоног өмнө
Оюутолгойн ажилтан амиа алдаж, бас нэг ажилтан СЭМҮТ-д хүргэгджээ

Өнгөрсөн шөнө /2021.02.12-13/ Оюутолгойн Гүний уурхайд нэг ажилтан нас баржээ. Хэргийн газарт ямар нэг осол аваар гараагүй ч тухайн ажилтан амь насаа алдсан шалтгаан тодорхойгүй байна. Бид энэ талаар Оюутолгой компанийн Хэвлэл мэдээллийн ажилтнаас утсаар тодруулахад "Өнгөрсөн шөнө манай уурхайд ийм харамсалтай хэрэг гарсан. Бид журмын дагуу цагдаагийн байгууллагад дуудлага мэдээлэл өгч, шалгуулж байна. Талийгаачийн ар гэр, нутаг орныхонд мэдээлэл өгсөн. Ар гэр болон хамтран ажиллагсдад шаардлагатай тусламжийг үзүүлж байна. Хэрэг шалгагдаж байгаа учраас дэлгэрэнгүй мэдээлэл өгөх боломжгүй. Манай уурхайн зорилго бол аюулгүй байдлыг хангах явдал байдаг. Тиймээс  ч жилийн 365 хоногт үүнд анхаардаг. Хэрэв ажлын байр аюултай гэж үзвэл ажилтан ажлаа шууд зогсоох эрхтэй" гэсэн мэдээлэл өглөө. 

Сүүлийн хагас жилийн хугацаанд Оюутолгойд дөрвөн хүн амь насаа алдаж, нэг ажилтны сэтгэцэд өөрчлөлт орлоо.  

- Өнгөрсөн есдүгээр сард тус уурхайн ажилтан зүрх судасны өвчнөөр өвдөж, эмнэлгийн тусламж авч чадалгүй нас барсан 

-  Өнгөрсөн нэгдүгээр сарын 19-ны өдөр 42 настай М ажлын байрандаа учир битүүлгээр нас барсан

- Өнгөрсөн нэгдүгээр сарын 31-ний өдөр 42 настай ажилтан ажлын байрандаа өөрийгөө боомилсон байдалтай олдсон

- Өнгөрсөн шөнө Гүний уурхайд нэг ажилтан шалтгаан тодорхойгүйгээр нас барсан. 

- Мөн 2021 оны хоёрдугаар сарын 11-ний өдөр буюу Цагаан сарын битүүний өдөр нэг ажилтан галзуурч, СЭМҮТ-д хүргэгдсэн. 

Дээрх харамсалтай ослуудын шалтгаан нөхцөл тодорхойгүй, "хэргийг шалгаж байгаа" гэдэг байдлаар уурхайн зүгээс ч, уул уурхайн салбарын зүгээс ч ямар нэг тайлбар мэдээлэл хийлгүйгээр эрдэнэт хүн амь насаа алдсаар байна. 

"Гадны том төсөл, манай улсын эдийн засгийг нуруундаа үүрч яваа" гэдэг халхавч үгсээр эрдэнэт хүн амь насаа алдахад нүд нь балай, чих нь дүлий суусаар л байх уу!!! 

Уул уурхай, хүнд үйлдвэрийн сайд Г.Ёндон та эдгээр ослуудын талаар мэдээлэлтэй юу? Ямар нэг хяналт шалгалт хийж, асуудлыг тодруулан судалж, өөрчлөлт шинэчлэл хийхээр анхаарлаа хандуулж байгаа юу?!

Өөрсдийнх нь хэлснээр "Аюулгүй байдлыг эн тэргүүнд тавьдаг" Оюутолгойд яагаад зургаан сарын дотор дөрвөн эрдэнэт амь үрэгдэж, ажилтан нь сэтгэцийн өөрчлөлтөд орж байна вэ? Ажлын байрны дарамт шахалт байна уу, ажил амралтын хуваарь алдагдсанаас уу, ажлын орчин нөхцөл хүний эрүүл мэндэд яаж нөлөөлж байна вэ... шалтгаан нөхцөл байж болох энэ мэт олон асуултууд хариутгүй байна, Г.Ёндон сайд аа!!!

 

Хаха 4 79 Буруу 12 Гайхмаар 98 Харамсалтай 6 Хөөрхөн

Сэтгэгдэл бичих

АНХААР! Сэтгэгдэл хэсэгт ёс бус бичвэр оруулахыг хориглоно. *

Сэтгэгдэл

Нийт сэтгэгдэл 24